မာန်အောင်မြို့၊ (၁၊ မတ်လ၊ ၂၀၁၉ခုနှစ်)
ကျန်းမာရေးနှင့် အားကစားဝန်ကြီးဌာန၊ ပြည်သူ့ကျန်းမာရေးဦးစီးဌာန နှင့် မြန်မာနိုင်ငံ ကျန်းမာရေးမှူးအသင်း (MHAA) တို့ ပူးပေါင်းဆောင်ရွက်သည့် “ကျန်းမာရေးဝန်ဆောင်မှု လက်လှမ်းမှီရရှိရေး” စီမံချက် (Promoting Access to Health in Rakhine State Project) ၏ မြို့နယ်အဆင့် စီမံချက်အကြောင်း အသိပေးရှင်းလင်းခြင်း အခမ်းအနားကို မတ်လ ၁ ရက်နေ့ နေ့လယ် (၁) နာရီ မှ (၃) နာရီ အထိ မာန်အောင်မြို့နယ် ၊ မြို့နယ်အထွေထွေအုပ်ချူပ်ရေးဦးစီးဌာနရုံးအစည်းအဝေးခန်းမတွင် ကျင်းပပြုလုပ်ခဲ့ပါသည်။
ယင်းအခမ်းအနားသို့ မြို့နယ်အထွေထွေအုပ်ချူပ်ရေးဦးစီးဌာနမှူး၊ မြို့နယ်ပြည်သူ့ကျန်းမာရေးဦးစီး ဌာနမှူး၊ ဌာနဆိုင်ရာမှ တာဝန်ရှိပုဂ္ဂိုလ်များ၊ NGO၊ INGO အဖွဲ့များမှ တာဝန်ရှိသူများနှင့် ကျန်းမာရေးဝန်ထမ်းများ စုစုပေါင်း(၁၀၀) ဦးခန့် တက်ရောက်ခဲ့ပါသည်။
အစည်းအဝေးတွင်မြို့နယ်အထွေထွေအုပ်ချုပ်ရေး ဦးစီးဌာနမှူး ဦးမြင့်လှိုင် နှင့် မြို့နယ်ပြည်သူ့ကျန်းမာရေးဦးစီးဌာနမှူး ဒေါက်တာသန်းထွန်း တို့က ကြိုဆိုနှုတ်ခွန်းဆက် အဖွင့်အမှာစကား ပြောကြားခဲ့ပါသည်။
ဆက်လက်၍ မာန်အောင်မြို့နယ် PATH-R Project ၏ စီမံချက်အရာရှိ ဦးသစ်လွင်ဦးက မြန်မာနိုင်ငံကျန်းမာရေးမှူးအသင်းအကြောင်း နှင့် PATH-R Project မှ ဆောင်ရွက်မည့် ကျန်းမာရေးစောင့်ရှောက်မှု လုပ်ငန်းများအကြောင်း ရှင်းလင်းတင်ပြခဲ့ပါသည်။ထို့နောက် တက်ရောက်လာသော မိတ်ဖက်အဖွဲ့အစည်းများ၏ တာဝန်ရှိသူများနှင့် ကျန်းမာရေးဝန်ထမ်းများက PATH–R Project နှင့် ပတ်သက်၍ ဆက်လက်ဆောင်ရွက်မည့် ကျန်းမာရေးစောင့်ရှောက်မှု လုပ်ငန်းများနှင့် သိရှိလိုသော အချက်များအကြောင်း ဆက်လက်မေးမြန်း ဆွေးနွေးခဲ့ကြပါသည်။
ပြန်ကြားရေး/ မြန်မာနိုင်ငံကျန်းမာရေးမှူးအသင်း
