(၁၄) ကြိမ်မြောက် မြန်မာနိုင်ငံကျန်းမာရေးမှူးအသင်း ညီလာခံ အောင်မြင်စွာ ကျင်းပပြီးစီး

ညီလာခံမှ "ဗဟိုအလုပ်အမှုဆောင်အဖွဲ့သစ် (၂၀၂၀-၂၀၂၁) ခုနှစ်" ဖွဲ့စည်း

ရန်ကုန် (ဒီဇင်ဘာလ ၂၉ ရက်၊ ၂၀၁၉ ခုနှစ်)

(၁၄) ကြိမ်မြောက် မြန်မာနိုင်ငံကျန်းမာရေးမှူးအသင်း ညီလာခံ ဒုတိယနေ့အခမ်းအနားကို ဒီဇင်ဘာလ (၂၉) ရက်တွင် ရန်ကုန်မြို့ သူနာပြု တက္ကသိုလ်ခန်းမ၌ ဆက်လက်ကျင်းပခဲ့ပြီး မြန်မာနိုင်ငံကျန်းမာရေးမှူးအသင်း ဗဟိုအလုပ်အမှုဆောင်အဖွဲ့သစ် (၂၀၂၀ -၂၀၂၁) ခုနှစ်ကို အတည်ပြုဖွဲ့စည်းခဲ့သည်။

(၁၄) ကြိမ်မြောက် မြန်မာနိုင်ငံကျန်းမာရေးမှူးအသင်း ညီလာခံ ဒုတိယနေ့အခမ်းအနားတွင် မြန်မာနိုင်ငံကျန်းမာရေးမှူးအသင်း ဖွဲ့စည်းပုံစည်းမျဉ်း (၂၀၁၆) အား ပြင်ဆင်ဖြည့်စွက်ရေးဆွဲထားသည့် ဖွဲ့စည်းပုံစည်းမျဉ်း (၂၀၁၉) မူကြမ်းအားတင်သွင်းခြင်း၊ မြန်မာနိုင်ငံကျန်းမာရေးမှူးအသင်း ဗဟိုအလုပ်အမှုဆောင်အဖွဲ့ (၂၀၁၈-၂၀၁၉)၏ လုပ်ငန်းဆောင်ရွက်မှု အစီရင်ခံစာနှင့် ဘဏ္ဍာရေးအစီရင်ခံစားများအား ဖတ်ကြားတင်သွင်းခြင်း၊ ပြည်နယ်/တိုင်းဒေသကြီး ကိုယ်စားလှယ်များမှ လုပ်ငန်းဆောင်ရွက်မှု အစီရင်ခံစာနှင့် ဘဏ္ဍာရေးအစီရင်ခံစာတို့အပေါ် ပြန်လည်ဆွေးနွေးခြင်း၊ မြန်မာနိုင်ငံကျန်းမာရေးမှူးအသင်း ဗဟိုအလုပ်အမှုဆောင်အဖွဲ့လုပ်ငန်းဆောင်ရွက်မှု အစီရင်ခံစာနှင့် ဘဏ္ဍာရေးအစီရင်ခံစားများအား အတည်ပြုကြောင်း ကြေညာခြင်း၊ ပြည်နယ်/တိုင်းဒေသကြီး မြန်မာနိုင်ငံကျန်းမာရေးမှူးအသင်းတို့၏ မေးခွန်းများအားဖြေကြားခြင်းနှင့် အကြံပြုချက်များအား အတည်ပြုခြင်း၊ (၁၄) ကြိမ်မြောက် မြန်မာနိုင်ငံကျန်းမာရေးမှူးအသင်း ညီလာခံမှ ရှေ့လုပ်ငန်းစဉ်များချမှတ်ခြင်း၊ မြန်မာနိုင်ငံကျန်းမာရေးမှူးအသင်း ဗဟိုအလုပ်အမှုဆောင်အဖွဲ့ (၂၀၁၈-၂၀၁၉) နှုတ်ထွက်ကြောင်း ကြေညာခြင်း များဆောင်ရွက်ခဲ့ကြသည်။

ဆက်လက်၍ မြန်မာနိုင်ငံ ကျန်းမာရေးမှူးအသင်း နာယက( ၅ ) ဦး ရွေးချယ်ရေးကို မဲဆန္ဒခံယူ၍ ရွေးချယ်ဆောင်ရွက်ခဲ့ကြသည်။ ရွေးချယ်ခံရသော ကျန်းမာရေးမှူးအသင်း နာယက (၅) ဦးတို့မှာ ဦးအေးမြင့်၊ ဦးစိုးတင့်၊ ဦးစောစံသိန်း၊ ဦးမြဟန် နှင့် ဦးချစ်သောင်းတို့ ဖြစ်ကြသည်။

ထို့နောက် မြန်မာနိုင်ငံကျန်းမာရေးမှူးအသင်း ဗဟိုအလုပ်အမှုဆောင်အဖွဲ့ (၂၀၂၀-၂၀၂၁) ခုနှစ် ဖွဲ့စည်းရေးကို ဆက်လက်ဆောင်ရွက်ကြရာ (၂၀၂၀-၂၀၂၁)ခုနှစ်အတွက် ရွေးချယ်တင်မြှောက်ခြင်းခံရသည့် ပြည်နယ်/တိုင်းဒေသကြီး မြန်မာနိုင်ငံကျန်းမာရေးမှူးအသင်း ဥက္ကဋ္ဌ (၁၉)ဦး၏ အမည်စာရင်းများအားကြေညာခြင်း၊ (၂၀၂၀-၂၀၂၁)ခုနှစ်အတွက် ဗဟိုအလုပ်အမှုဆောင်အဖွဲ့ဥက္ကဋ္ဌ ရွေးချယ်တင်မြှောက်ခြင်းနှင့် ဥက္ကဋ္ဌမှ ဗဟိုအလုပ်အမှုဆောင်အဖွဲ့ (CEC) အား ရွေးချယ်ဖွဲ့စည်းပြီး အတည်ပြုကြေညာခြင်း၊ မြန်မာနိုင်ငံကျန်းမာရေးမှူးအသင်း ဗဟိုအမှုဆောင်အဖွဲ့ဝင်များ (၂၀၂၀ -၂၀၂၁) ခုနှစ် ကတိသစ္စာခံယူခြင်းများဆောင်ရွက်ခဲ့ကြသည်။

(၂၀၂၀ -၂၀၂၁) ခုနှစ်အတွက် မြန်မာနိုင်ငံကျန်းမာရေးမှူးအသင်း ဗဟိုအလုပ်အမှုဆောင်အဖွဲ့ဝင်များမှာ ဥက္ကဋ္ဌ ဦးမြသွင်၊ ဒု-ဥက္ကဋ္ဌ - ဦးဌေးအောင်၊ အတွင်းရေးမှူး - ဦးဇော်နိုင်၊ ဘဏ္ဍာရေးမှူး - ဦးကိုကို၊ တွဲ - အတွင်းရေးမှူး - ဦးစောရွှေချိန်၊ စာရင်းစစ် (၁) - ဦးမျိုးတင့် နှင့် စာရင်းစစ် (၂) - ဦးဉာဏ်ထွန်း တို့ ဖြစ်ကြသည်။

"အသင်းကြီးဖွံ့ဖြိုးတိုးတက်ရေးအတွက် အသင်းဝင်အားလုံးရဲ့အားကို ယူပြီးအစွမ်းရှိသမျှ ကြိုးစားပါမယ်လို့ ကျွန်တော်ကတိပြုပါတယ်။ အားလုံးရဲ့ အကြံဉာဏ်တွေကိုလည်း ခံယူပါမယ်။ ကျွန်တော်တို့ အသင်းကြီးရဲ့ဂုဏ်သိက္ခာမြင့်မားတိုးတက်လာအောင်၊ အသင်းဝင်တွေကြား စည်းလုံးညီညွှတ်မှု ပိုမိုအားကောင်းလားအောင် ကျွန်တော်ကြိုးစားသွားမှာပါ" ဟု (၂၀၂၀-၂၀၂၁) ဗဟိုအလုပ်အမှုဆောင်အဖွဲ့ ဥက္ကဋ္ဌသစ် ဦးမြသွင်က နှုတ်ခွန်းဆက်အမှာစကားတွင် ယခုကဲ့သို့ ကတိပြုပြောကြားခဲ့သည်။

(၁၄) ကြိမ်မြောက် မြန်မာနိုင်ငံကျန်းမာရေးမှူးအသင်း ညီလာခံ ဒုတိယနေ့အခမ်းအနားကို ဒီဇင်ဘာလ (၂၉) ရက် ညနေ (၃) နာရီတွင် အောင်မြင်စွာ ပြီးဆုံးခဲ့သည်။

ပြန်ကြားရေး/မြန်မာနိုင်ငံကျန်းမာရေးမှူးအသင်း

Images Gallery

(၁၄) ကြိမ်မြောက် မြန်မာနိုင်ငံကျန်းမာရေးမှူးအသင်း ညီလာခံ အောင်မြင်စွာ ကျင်းပပြီးစီး