လှိုင်းဘွဲ့(ဩဂုတ်လ ၂၆ရက်၊၂၀၂၀ခုနှစ်)
(၂၀၂၀)ပြည့်နှစ် အာဟာရဖွံ့ဖြိုးရေးရက်သတ္တပတ် အထိမ်းအမှတ် အခမ်းအနားကို ဩဂုတ်လ (၂၆) ရက်နေ့တွင် ကရင်ပြည်နယ်၊ လှိုင်းဘွဲမြို့၊ ပိုင်ကျုံကျန်းမာရေးဌာန၌ ပြုလုပ်ခဲ့ကြသည်။
အခမ်းအနားတွင် ပိုင်ကျုံမြို့ အုပ်ချုပ်ရေးမှူး ဦးထွန်းရန်အောင်မှ အခမ်းအနား အဖွင့်အမှာစကားပြောကြားခဲ့ပြီး ပိုင်ကျုံကျန်းမာရေးဌာနမှ ကျန်းမာရေးမှူးဦးသက်နိုင်စိုးမှ အာဟာရနှင့်ပတ်သက်သည့် ကြယ် (၄)ပွင့် အကြောင်းရှင်းလင်းပြောကြားခဲ့သည်။
ဆက်လက်၍ ပိုင်ကျုံကျန်းမာရေးဌာန အမျိုးသမီးကျန်းမာရေးဆရာမ ဒေါ်နန်းသီသီအေးမှ အာဟာရပြည့်ဝသည့်အစားအစာများ ချက်ပြုတ်သရုပ်ပြခဲ့ပြီး အစာအုပ်စု (၃)စု အကြောင်း ရှင်းလင်းတင်ပြခဲ့ပါသည်။
ထို့အပြင် ပိုင်ကျုံကျန်းမာရေးဌာနမှ သားဖွားဆရာမ ဒေါ်နန်းခင်လှဝင်းမှ စနစ်တကျ မိခင်နို့တိုက်ကြွေးခြင်းနှင့် စံပြကိုယ်ဝန်ဆောင်များအကြောင်း ရှင်းလင်းတင်ပြခဲ့ပါသည်။
ထို့နောက် မြန်မာနိုင်ငံကျန်းမာရေးမှူးအသင်း စီမံချက်အရာရှိ ဦးလွှမ်းမိုးမှ ဒေသစွမ်းအားဖြင့် သာတူညီမျှကျန်းမာရေးစောင့်ရှောက်ရေးလက်လှမ်းမီရရှိရေး စီမံချက်ကို (၂၀၁၉) ဇန်နဝါရီလမှစ၍ စတင်အကောင်အထည်ဖော်ဆောင်ရွက်လျှက်ရှိပါကြောင်း၊ စီမံချက်တွင် မိခင်နှင့်ကလေးစောင့်ရှောက်ရေးလုပ်ငန်း၊ အာဟာဖွံ့ဖြိုးရေးလုပ်ငန်း၊ တီဘီရောဂါတိုက်ဖျတ်ရေးလုပ်ငန်း၊ ငှက်ဖျားရောဂါတိုက်ဖျတ်ရေးလုပ်ငန်းနှင့် မျိုးဆက်ပွားကျန်းမာရေးပညာပေးခြင်းလုပ်ငန်းများကို မြို့နယ်ပြည်သူ့ကျန်းမာရေးဦးစီးဌာနနှင့် ပူးပေါင်းဆောင်ရွက်လျက်ရှိကြောင်း မြန်မာနိုင်ငံကျန်းမာရေးမှူးအသင်းမှ အကောင်အထည်ဖော်ဆောင်ရွက်နေသော စီမံချက်လုပ်ငန်းများနှင့်ပတ်သက်ပြီးပြောကြားခဲ့ပါသည်။
အခမ်းအနားသို့ တက်ရောက်လာသော ကိုယ်ဝန်ဆောင်မိခင်များနှင့် နို့တိုက်မိခင်များအား မိခင်နှင့်ကလေး ဥက္ကဌ ဒေါ်အေးယုအောင် နှင့် အမျိုးသမီးကျန်းမာရေးဆရာမဒေါ်နန်းသီသီအေးတို့က အာဟာရနှင့်ပတ်သက်သော ကျန်းမာရေးဆိုင်ရာဗဟုသုတ မေးခွန်းများမေးမြန်းဆွေးနွေးကာ ဆုလက်ဆောင်များ ချီးမြှင့်ခဲ့သည်။
ပြန်ကြားရေး/မြန်မာနိုင်ငံကျန်းမာရေးမှူးအသင်း
